मेस्सीको आगामी नयाँ यात्राबारे पेप ग्वार्डिओलाको भित्री खुलासा

एजेन्सी, चैत १८

स्पेनिस क्लब बार्सिलोनामा कप्तान लिओनल मेस्सीको सम्झौता यो सिजनको अन्त्यसँगै सकिँदैछ । यदि क्लब र उनीबीच अब अढाई महिनामा नयाँ सम्झौता नभए मेस्सी आगामी समर सिजनमा आफूले चाहेको क्लबमा जान स्वतन्त्र हुनेछन् । यो सिजनको पूर्वसन्ध्यामै क्लब छाड्ने निर्णय गरेका मेस्सीले बार्सिलोना छाड्न सक्ने चर्चा अहिले पनि छ । तर, क्लबको नयाँ अध्यक्षमा उनीसँग सुमधुर सम्बन्ध रहेका जोन लापोर्टा आएकाले मेस्सीले क्लब नछाड्ने र नयाँ सम्झौता गरेर बार्सिलोनामै रहने सम्भावना बढेको पनि बताइन्छ ।।

गत समरबाटै मेस्सीको नाम इंग्लिस क्लब म्यानचेस्टर सिटी र फ्रेन्च क्लब पिएसजीसँग नजिकबाट जोडिँदै आएको छ । धेरैको बुझाइ र अड्कलबाजी यो छ कि, मेस्सी सिटी जान चाहन्छन् । किनभने, त्यहाँ बार्सिलोनामा लामो समय एकदमै नजिक भएर काम गरेका पेप ग्वार्डिओला प्रशिक्षक छन् । बार्सिलोनामा लामो समय सँगै काम गरेका यी दुईलाई पुनः एकै क्लबमा काम गरेको हेर्न चाहने अहिले पनि धेरै छन् । मेस्सी ३४ वर्षका हुन लागे पनि अझै यो सम्भावनालाई धेरैले नजिक देखिरहेका छन् । के मेस्सी साँच्चै बासिलोना छाड्दैछन् ? छाडेको अवस्थामा उनी सिटी नै जान्छन् ?

मेस्सीको भविष्यबारे उनै ग्वार्डिओलाले सांकेतिक रूपमा खास खुलासा गरिदिएका छन् । ‘द सन’ सँग कुरा गर्दै उनले सन्देश दिएका छन्, जसबाट यो सिजनपछि मेस्सीको भविष्य के हुनेवाला छ भनेर सजिलै बुझ्न सकिन्छ । ग्वार्डिओलाका अनुसार बार्सिलोनाको नयाँ अध्यक्षमा लापोर्टा आएसँगै मेस्सीका लागि अनुकूल वातावरण बन्दै गइरहेको छ । र, लापोर्टा पुनः मेस्सीकै वरिपरि रहेर पुरानो बार्सिलोनालाई फर्काउन आकर्षक खेल योजना ल्याउने तयारीमा छन् । मेस्सीसँग आफू सधैं सम्पर्कमा रहेको पनि ग्वार्डिओलाले बताएका छन् ।

‘लियोको बारेमा मानिसले धेरैखाले कुरा गरे । ती कति सत्य थिए, कति झुठा, मलाई थाहा छैन । तर, हामी त सधैं संवादमै थियौं । किनभने, हामीबीच कुनै दूरी छैन । आज पनि हामी कुरा गर्छौ ।, फुटबल, घरपरिवार र जीवनका बारेमा कुरा गर्छौं । उनी लामो समयदेखि बार्सिलोनामा छन् । आजसम्म पनि उनी त्यहीं छन्, यो देख्दा म ज्यादै खुसी छु । किनभने, उनी त्यहाँ हुनु सबैभन्दा राम्रो कुरा हो । उनी बार्सिलोनामा हुनु र बार्सिलोनासँग मेस्सी हुनु सुन्दर कुरा हो,’ ग्वार्डिओलाले भनेका छन् ।

मेस्सीको आगामी भविष्यलाई संकेत गर्दै ग्वार्डिओलाले भनेका छन्, ‘मैले धेरैपटक यो कुरा भन्दै आएको छु– लियो बार्सिलोनामै रहून् । यो मजस्ता धेरैको चाहना हो । अस्तिसम्म उनी त्यहाँबाट बाहिर हुन चान्थे । तर, उनी अब बिस्तारै त्यहाँ खुसी हुन थालेका छन् । उनी बार्सिलोनासँग फेरि रमाउन थालेका छन् । यसको अर्थ तपाईं पक्कै बुझ्नुहुन्छ होला । म लियोलाई धेरै राम्रोसँग बुझ्छु । उनी अझै बार्सिलोनाका लागि धेरै खेल्न र धेरै जित्न चाहन्छन् । उनी अझै त्यहाँ राम्रो समय ल्याउन चाहन्छन् ।’

नयाँ अध्यक्ष लापोर्टाले बार्सिलोनामा पुनर्जागरण ल्याउने कुरा ग्वार्डिओलाले बताएका छन् । उनले भनेका छन्, ‘लापोर्टा नयाँ अध्यक्षमा आउनु राम्रो कुरा हो । मलाई लाग्छ, उनी पुरानो बार्सिलोना फर्काउन चाहन्छन् । उनले आगामी दिनका लागि राम्रा योजना ल्याउनेवाला छन् । त्यहाँ अब जागरणको समय हुनेछ । तर, यी सबै कुरा मेस्सीकै वरिपरि रहेर हुनेछ । मेरो विचारमा अहिले नै बार्सिलोना मेस्सबिनै अघि बढ्ने तयार भएको छैन । मेस्सीले कस्तो निर्णय लिन्छन् भन्नेमा बार्सिलोनालाई शंका छ । तर, उनीहरूले एकअर्कालाई धेरै राम्रोसँग बुझेका छन् ।’

प्रकाशित मिति १८ चैत्र २०७७, बुधबार १५:१९
Loading...